बागलुङ/केही जनप्रतिनिधिले विकास निर्माणका योजनामा अनियमितता गर्दा अख्तियारको फन्दामा परेको समाचारहरु अखबारका हेडलाइन बनिरहँदा यहाँका एक जनप्रतिनिधिले भने आफुले प्राप्त गर्ने तलब सुविधा सामाजिक काममा लगाउँदै आएका छन् ।
बागलुङ नगरपालिकाको उप–प्रमुखमा उम्मेदवारी दिएपछि राजु खड्काले जनप्रतिनिधिको रुपमा प्राप्त गर्ने सेवा सुविधा जनसेवामा लगाउने घोषणा गरेका थिए । चुनावी वाचालाई उप–प्रमुख बनेको ८ महिनामै कार्यान्वयन गरेका खड्काले प्राप्त तलब सुविधा विद्यालयमा अक्षयकोषदेखि किरियापुत्री भवन निर्माणमा लगाउँदै आएका छन् ।
खड्काले रामरेखा आधारभूत विद्यालयलाई १ लाख, त्रिभुवन माध्यमिक विद्यालय पैयुँपाटालाई १ लाख, सिगाना माध्यमिक विद्यालय लामिचौरलाई ४४ हजार, विश्वकर्मा माध्यमिक विद्यालय कालीमाटीलाई ७५ हजार, नेपाल पत्रकार महासंघ बागलुुङ शाखालाई ३५ हजार, कृष्ण प्राथमिक विद्यालय सम्माचौरलाई ५० हजार रुपैयाँ प्रदान गरेका छन् ।
यस्तै, उपल्लाचौर किरियापुत्री भवनलाई ३५ हजार, मानवसेवा आश्रमलाई १ लाख र राधाकृष्ण मन्दिर संरक्षण, व्यवस्थापन र नित्य पुजाका लागि अक्षयकोष वृद्धिका लागि ३५ हजार रुपैयाँ प्रदान गरिएको खड्काले जानकारी दिए । ‘‘आवश्यकता हेरेर विद्यालयदेखि विभिन्न कोष र संघसंस्थालाई सहयोग गर्दै आएको छु’’ खड्काले भने ।
खड्काले चाडपर्वमा सहिद, बेपत्ता र घाइतेका परिवार, ज्याला मजदुरी गरी जीविकोपार्जन गर्दै आएको परिवारलाई लत्ताकपडा र खाद्यान्न वितरण गर्दै आएका छन् । खड्काले तलब सुविधाबाट प्राप्त भएको धेरै रकम वितरण गर्न भने बाँकी रहेको बताए ।
शैक्षिक सुधारसंगै सामुदायिक विद्यालयका विद्यार्थीको हितका लागि अक्षयकोष स्थापना गर्दै जाने, सहिद परिवार, गरिब तथा अपाङ्गताको क्षेत्रमा सहयोग गर्ने खड्काको योजना छ । ‘‘जनप्रतिनिधिको सेवा सुविधा सामाजिक कार्यमा खर्च गर्न पाउँदा गौरवसंगै सामाजिक उत्तरदायित्व बहन गरेको महशुश हुन्छ’’ खड्काले भने ।
उप–प्रमुखबाट प्राप्त रकमबाट रुद्रेपिपल मावि र रामरेखा आधारभूत विद्यालयले अक्षयकोष बनाएर गरिब तथा जेहेन्दार विद्यार्थीलाई छात्रवृत्ति प्रदान गर्दै आएका छन् । ‘‘अक्षयकोषले गरिबीका कारण पठनपाठनमा समस्या भोगिरहेका विद्यार्थीलाई धेरै राहत मिलेको छ’’ रामरेखा आधारभूत विद्यालयका शिक्षक रेशम गोतामेले भने ।
बागलुङ बागलुङ नगरपालिका वडा नं. ४ स्थित कुँडुले माविले शैक्षिक सुधारका कार्यक्रममा खर्चिने भएको छ । यो विद्यालयले एसईई परीक्षामा उत्कृष्ट नतिजा हासिल गरेको थियो । सामुदायिक विद्यालयको शैक्षिक गुणस्तर सुधार्न उप–प्रमुखबाट प्रोत्साहन स्वरुप प्राप्त रकमले प्रगतिमा थप टेवा पुग्ने प्रधानाध्यापक हरि प्रसाद कँडेलले भने ।
प्रदेश सभाले निर्माण गरेको कानुनमा जनप्रतिधिको प्रमुखको सेवासुविधा ३० हजारदेखि ४२ हजार रुपियाँसम्म हुने व्यवस्था छ । जनप्रतिनिधिले पाउने सुविधामा मासिक सुविधा, सञ्चार, दैनिक भ्रमण भत्ता, वैदेशिक भ्रमण भत्ता, इन्धन खर्च, यात्रा बीमा, स्थानीय तहमा निर्माण भएका विभिन्न समितिमा उपस्थिति बैठक भत्तालगायत छन् ।
मनकारी बागलुङ नगरका उप–प्रमुखः तलब सुविधा सामाजिक काममा
