पर्वत – मोदी गाउँपालिकाले प्रथम गाउँपालिका अध्यक्ष कप २०८२ र पाँचौं राष्ट्रपति रनिङ शिल्ड प्रतियोगिता सञ्चालन गर्ने भएको छ । अध्यक्ष कप अन्तर्गत पर्वत जिल्लाका अन्तर पालिकास्तरीय पुरुष भलिबल प्रतियोगिता संचालन हुने गाउँपालिकामा बिहीबार आयोजित पत्रकार सम्मेलनमार्फत जानकारी दिईएको छ ।
गाउँपालिकाका प्रमुख प्रशासकिय अधिकृत बाबुराम पुरीका अनुसार आगामी मंसिर १४ देखि १९ गते सम्म खेल संचालन हुने भएको हो । प्रथम अध्यक्ष कप भलिवल प्रतियोगितामा जिल्लाका ७ वटै पालिकाका टिमहरु सहभागि हुने छन् । गाउँपालिकाहरुको अन्तरसम्बन्ध विकास गर्ने र सक्षम खेलाडीहरु उत्पादन गर्न यो प्रतियोगिताले सहयोग पुग्ने गाउँपालिकाका अध्यक्ष हिरादेबी शर्माले जानकारी दिनुभयो ।
अध्यक्ष कप अन्तर्गत प्रथम हुनेलाई नगद १ लाख राशिको पुरस्कार राखिएको छ भने दोस्रो हुनेलाई ७५ हजार र तेस्रो हुने टिमलाई ५० हजार पुरस्कार रहेको गाउँपालिकाका उपाध्यक्ष बिमल लामिछानेले जानकारी दिनुभयो । यसका साथै शिल्ड, मेडल, प्रमाणपत्र र विधागत रूपमा उत्कृष्ट खेलाडीलाई पुरस्कृत गरिने बताईएको छ ।
यसपटक भलिबलका अतिरिक्त जिल्ला स्तरीय ब्याडमिन्टन प्रतियोगिता पनि सञ्चालन गरिने आयोजकले जनाएको छ । ब्याडमिन्टन तर्फको प्रथम पुरस्कार २० हजार रुपैया रहेको छ भने द्वितीय १० हजार र तृतीय पुरस्कार ५ हजार रहेको छ । सो अवसरमा लोक भजन, रत्यौली, लोक नृत्य, लठ्ठो तान्ने लगायतका प्रतियोगिताहरु समेत समावेश गरिएको गाउँ पालिकाले जानकारी दिएको छ ।
त्यसैगरी सोही अवधिमा विद्यालय स्तरीय पाँचौं राष्ट्रपति रनिङ शिल्ड प्रतियोगिता समेत सञ्चालन हुने भएको छ । सो प्रतियोगिता अन्तर्गत छात्र छात्रा भलिबल, कपर्दी, दौड, सटपुट, ज्याब्लिन थ्रो, हाई जम्प, लङ जम्प, ट्रिपल जम्प, मार्सल आर्ट लगायतका स्पर्धाहरु हुने कुरा वडा नं ६ का वडाध्यक्ष दीपेन्द्रजंग लामिछानेले जानकारी दिनुभयो ।
प्रतियोगितामा मावि र निमावि तहका विद्यालयहरू सहभागी हुने छन् । टाढाबाट आउने विद्यालयका विद्यार्थीहरूको लागि यातायात खर्च समेत उपलब्ध गराइने सामाजिक विकास शाखा प्रमुख दिनेश शर्माले जानकारी दिनु भयो ।
गाउँपालिकाले एक सूचना प्रकाशित गरी मङ्सिर १४ गते देखि खेलकुद सञ्चालन हुने अवधिभर शैक्षिक संस्थाहरूमा सार्वजनिक बिदा दिएको छ ।