बलेवा, १२ भदौ– संक्रमणको त्रास बढ्दै गएपछि बागलुङ नगरपालिकाको बलेवा क्षेत्रका तीन वडाले निषेधाज्ञाको कार्यान्वयनमा थप कडाइ थालेका छन् । छिमेकी स्थानीय तहहरुसँग जोडिएका सिमानाका र वडावासीको आवात जावतमा कडाई गरिएको हो । बलेवाको अमलाचौर, नारायणस्थान र पैञ्युपाटाका वडाअध्यक्षहरुले टेलिफोन सम्बाद गर्दै तीनवटै वडामा एक अर्कालाई सहयोग गर्दै कडाई गर्ने सहमति भएको छ । छिमेकी जिल्ला पर्वतको मुकाम कुश्माबजार सँग जोडिएको नारायणस्थानका नाकाहरु आवत जावत नगर्न वडा कार्यालयले अनुरोध गरेको छ ।
बागलुङ नगरपालिका–१२ अमलाचौरले वडाबासीलाई ७ दिन वडा बाहिर नजान र बाहिर रहेकालाई वडा भित्र नआउनका लागि आग्रह गरेको छ । एक साताका लागि खाद्याान्न समेत भण्डारण रहेकाले दुध ढुवानी र बिरामी बोक्ने बाहेकका कुनैपनि सवारी साधनको आवत जावतमा रोक लगाईएको वडाअध्यक्ष गुरुदत्त पाठकले बताए । लमजुङबाट बिदामा आएका नेपाली सेनाका जवानको क्लोज कन्ट्रयाक ट्रेसिङमा बागलुङ नगरपालिका १० गलुवाका झण्डै ५२ जना परेपछि बलेवा क्षेत्रमा थप कडाई थालिएको वडाअध्यक्षहरुले बताएका छन् ।