बागलुङ/बागलुङ र प्युठान राष्ट्रिय जनमोर्चा (राजमो)को जनआधार भएको जिल्ला मानिन्छन् । तर, यसपटकको आम निर्वाचनमा राष्ट्रिय स्वतन्त्र पार्टीले चुनाव जित्दा राजमोका उम्मेदवारको जमानत समेत जोगिन सकेन् ।
पार्टीका केन्द्रीय अध्यक्ष चित्रबहादुर केसीको विरासत बोकेको बागलुङ क्षेत्र नं. १ मा राष्ट्रिय जनमोर्चाले नेपाल कम्युनिष्ट पार्टीसंग चुनावी तालमेल गरेपनि जमानत जोगाउन सकेन् । केसीको उत्तराधिकारीको रुपमा बागलुङ १ बाट कृष्णप्रसाद शर्मा अधिकारी चुनावी मैदानमा उत्रिएका थिए । दुई पार्टीबीच चुनावी तालमेल गर्दा पनि जमानत नजोगिएपछि कुनै समय बलियो आधार रहेको बागलुङमा राजमोको अस्तित्व जोगाउन चुनौती देखिएको छ ।
२०७९ को चुनावमा कांग्रेस, माओवादी केन्द्र र नेकपा एससहितको गठबन्धनबाट बागलुङ १ बाट चित्रबहादुरले चुनाव जितेका थिए । यसपटकको आम निर्वाचनमा राजमो चौथो स्थानमा खुम्चियो । चुनाव जितेका रास्वपाका सुशील खड्काले २० हजार ९ सय २७ मत प्राप्त गर्दा अधिकारी चौथो हुँदै ४ हजार ५ सय २१ मत मात्रै प्राप्त गरे ।
अधिकारीले पाएको मतले जमानत जोगाउन सकेन । कुल सदर मतको १० प्रतिशत प्राप्त नगरेमा जमानत जफत हुने कानुनी व्यवस्था अनुसार बागलुङमा सदर भएको ४७ हजार ६१ मतमा अधिकारीले जमानत जोगाउन ४ हजार ७ सय ६ मत ल्याउनुपर्ने थियो । समानुपातिकतर्फ पनि जनमोर्चाले निकै कम मत पाएको छ । समानुपातिकतर्फ क्षेत्र नं. १ मा ३ हजार ५ सय ९७ मत लिएर पाँचौं हैसियतमा पुगेको छ ।
प्रत्यक्षतर्फ दोस्रो हुने कांग्रेसका भीमबहादुर श्रीस रानाले ११ हजार ९ सय ४४, एमालेका हिराबहादुर केसीले ८ हजार ६ सय ४० मत प्राप्त गर्दा राप्रपा, श्रम संस्कृति पार्टी, प्रलोपा, नेशनल रिपब्लिक नेपाल, मंगोल नेशनल अर्गनाइजेशन, नेपाल कम्युनिस्ट पार्टी (माओवादी) र नेपाल मानवतावादी पार्टीका उम्मेदवारको जमानत जफत भएको हो ।