पर्वत-पर्वत जिल्लामा पछिल्ला केहि वर्ष यता कुष्ठरोगीको संख्या घट्दै गएको पाईएको छ ।
| अहिले जिल्लामा चार जनामात्रै कुष्ठरोगी रहेको प्रदेश जनस्वास्थ्य कार्यालय पर्वतले जनाएको छ । उनिहरु चारैजना उपचाररत रहेका छन् । जस मध्ये तीन जनाले प्रदेश अस्पताल पर्वतवाट नियमित उपचार तथा औषधी सेवन गरिरहेका छन् भने एक जनाले विहादीमा रहेको स्वास्थ्य केन्द्रवाट औषधी सेवन गर्दै आएको कार्यालयले जनाएको छ । | |
| ७३ औँ विश्व कुष्ठरोग दिवसको अवसरमा प्रदेश जनस्वास्थ्य कार्यालय पर्वतले आयोजना गरेको अन्तरक्रियामा आर्थिक वर्ष २०७९÷८० मा १५ जना कुष्ठरोगी रहेकोमा उनिहरु निको भैसकेका छन् भने आर्थिक वर्ष २०८०÷०८१ म ६ जना नयाँ पत्ता लागेका थिए । चालु आर्थिक वर्षमा ६ महिना सम्म चार जना पत्ता लागेकोमा उनिहरु सवै उपचाररत रहेको कार्यालय प्रमुख बद्रीराज आचार्यले जानकारी दिनुभयो । | |
| पछिल्लो समय जनचेतना अभिबृद्धि हुँदै जानु, जाँच तथा खोजपड्तालको कार्यक्रम कम हुनु लगायतका कारणले पनि कुष्ठरोगीको संख्या घट्दै गएको देखिन्छ । कुष्ठरोगको जाँच तथा खोजी कार्य निकै झण्झटिलो समेत रहेको छ भने अर्कोतर्फ बिरामीहरु खुल्न नचाहाने र समाजले हेर्ने दृष्टिकोणका कारण पनि समस्या भएको पर्वत अस्पतालका डा. मिलन अवालेले बताउनुभयो । | |
| धार्मिक ग्रन्थले गरेको व्याख्या र सामाजिक दृष्टिकोणका कारण रोग लुकाउने समस्या समाजमा व्याप्त रहेको उहाँको भनाई छ । कतिपय विरामीहरु सम्पर्कमा आउन नचाहेको पनि देखिएको छ । | |
| कुष्ठरोग निवारणका लागि नयाँ कुष्ठरोगीहरुको पहिचान गर्ने, उपचार गराइसकेका ठाउँहरुमा फेरि जाँचबुझ गर्ने, विद्यालयहरुमा सचेतनामूलक कार्यक्रम गर्ने र समयमै नागरिकलाई सुसूचित गराउँदै आएको कार्यालय प्रमुख आचार्यको भनाई छ । | |
| कुष्ठरोगको बारेमा समाजमा अझैपनि गलत धारणा रहेको बताउँदै समयमै उपचार गर्न सके कुष्ठरोग निको हुने डा. अवालेले बताउनुभयो । सदरमुकाम कुश्मा आसपासनै बिरामीहरु रहेकोले जनचेतनासँगै बिरामीहरुको उपचार गराउने उदाशिनताका कारण यो रोग निर्मुल पार्न नसकिएको उहाँको भनाई छ । | |
| कार्यक्रममा जिल्ला समन्वय समिति पर्वतका प्रमुख विष्णुराम विकले जुनसुकै रोग लागेपनि व्यक्ति संवेदनशिल हुनुपर्नेमा जोड दिनुभयो । कुष्ठरोगलाई पनि अन्य रोगहरुसरह हेर्नुपर्ने बताउँदै यसका लागि समाजमा सचेतना फैलाउन जरुरी रहेको उहाँको भनाई छ । | |
| कार्यक्रममा प्रदेश अस्पताल पर्वतका निमित्त मेडिकल सुपरिटेन्डेन्ट डा. बालकृष्ण श्रेष्ठ, पत्रकार महासंघ पर्वतका अध्यक्ष लक्ष्मण सापकोटा, अपाङ्ग उत्थान समाज पर्वतका अध्यक्ष जगन्नाथ शर्मा लगायतले बोल्नुभएको थियो । कार्यक्रममा स्वागत तेजप्रसाद सुवेदी र संचालन नारायणप्रसाद रेग्मीले गर्नुभएको थियो । |