न्यू एभरेष्ट एकेडेमी बागलुङको २० औं वार्षिकोत्सव तथा अभिभावक दिवस विविध कार्यक्रमका साथ बिहिबार मनाईएको छ ।
वार्षिकोत्सव मुल समारोहको उद्घाटन गर्दै बागलुङ नगरपालिकाका नगर शिक्षा अधिकारी धनप्रसाद पोखरेलले शैक्षिक गुणस्तरको हिसाबले न्यू एभरेष्ट एकेडेमी जिल्लामै नमुना विद्यालयको रुपमा स्थापित भएको बताए ।
गत सालको एसर्ईईमा यस विद्यालयले जिल्लामै उत्कृष्ट नतिजा हासिल गर्न सफल भएको चर्चा गर्दै उनले विद्यार्थीलाई व्यवहारिक र नैतिकवान बनाउनुपर्नेमा जोड दिए ।
विद्यार्थीलाई नैतिकवान र चरित्रवान बनाउनका लागि विद्यालयको महत्वपुर्ण हात रहने भएकोले किताबी ज्ञान मात्र नभई सामाजिक, सांस्कृतिक र नैतिक शिक्षामा पनि विद्यालयले जोड दिनुपर्ने पोखरेलले बताए । पोखरेलले नेपालमा जस्तो प्रतिस्पर्धा गर्न सक्ने शिक्षा अन्य मुलुकमा नभएकोले गुणस्तरिय शिक्षाको लागि विदेशिनु नपर्ने चर्चा गरे ।
सो अवसरमा विद्यालयको प्रतिवेदन प्रस्तुत गर्दै प्रिन्सिपल कृष्ण अधिकारीले विद्यालयमा अध्ययन गरेका विद्यार्थीलाई हरेक क्षेत्रमा प्रतिस्पर्धा गर्न सक्ने बनाउनका लागि विद्यालयले सक्दो मेहेनत र परिश्रम गरिरहेको बताए । विद्यालयमा हाल ४ सय ९० जना विद्यार्थी अध्यनरत रहेको अधिकारीले जानकारी दिए ।
विद्यालय व्यवस्थापन समितिका अध्यक्ष हरिनारायण गौतमले विद्यालयले गरेको मेहेनत अनुसार विद्यार्थी र अभिभावक पनि सहयोगी भएकाले विद्यालयले उत्कृष्ट नतिजा हासिल गर्न सफल बनेको चर्चा गरे । उनले आगामी दिनमा विद्यालयलाई अझै ब्यवस्थापनका साथ थप मजबुत बनाउनेमा जोड दिए ।
कार्यक्रममा अभिभावक कृष्णबहादुर नेपाली, विद्यार्थी अनुष्का कँडेल, आरोह पोखरेल, दिव्या गौतम लगायतले शुभकामना मन्तव्य व्यक्त गरेका थिए ।
सो अवसरमा विद्यार्थीले आफैले तयार गरेका विभिन्न खानाका परिकार समावेश भएको चारवटा स्टल समेत राखिएको थियो । कार्यक्रममा विद्यार्थी, अभिभावक र शिक्षकहरुको नृत्य प्रस्तुत, विद्यार्थीको फेसन सो लगायतका कार्यक्रम समेत प्रस्तुत भएका थिए ।
कार्यक्रम अध्यक्ष हरिनारायण गौतमको अध्यक्षता, शिक्षक प्रवेश मुखिया र अनुस्का कँडेलको स्वागत तथा शिक्षिका सनम खत्रीको संचालनमा सम्पन्न भएको थियो ।
न्यू एभरेष्ट एकेडेमीको २० औं वार्षिकोत्सव: विद्यार्थीले तयार गरेका ‘खानाका परिकार’देखि ‘फेसन सो’सम्म
