बागलुङ बजारमा सञ्चालनमा रहेका पानीपुरी तथा चटपट पसलहरुमा बिक्रिहुँदै आएको पानीपुरी र चटपटमा अखाद्य रंग मिसाउने गरेको भेटिएको छ । व्यवसायीले चटपट र पानीपुरी रंगाउनका लागि फुडकलर भन्दै अखाद्य रंग मिसाएको पाईएको हो ।
स्वास्थ्यमा प्रतिकुल असर पार्ने रंगहरु निर्वाध प्रयोग गरेको भेटिएको बागलुङ नगरपालिका उपभोक्ता हित संरक्षण समितिले जनाएको छ । खाद्य प्रबिधि तथा गुण नियन्त्रण डिभिजन कार्यालय बागलुङ, बागलुङ नगरपालिका र उपभोक्ता मञ्च बागलुङ र बागलुङ उद्योग बाणिज्य संघले मंगलबार पानीपुरी, चटपट र केही रेष्टुँरेण्टहरुमा अनुगमन गरेको थियो ।
“चटपटलाई रातो बनाउनका लागि कलर मिसाएको पाईयो, बोतलमा बिभिन्न रसायन मिलाएर राखिएको तरल पदार्थ हामिले भेटेजतीको नष्ट गरेका छौं ।” खाद्य प्रबिधि तथा गुण नियन्त्रण कार्यालय बागलुङका प्रमुख सुमन लामिछानेले भने “उपभोक्ता आँफैले पनि सचेत हुनुपर्छ, अखाद्य रंग मिसिएको खानेकुराले स्वास्थ्यमा असर गर्छ ।”
चटपट पसलहरु मध्ये अधिकांशले फोहोर बोतलमा रातो देखिनेगरी रंग तयार गरेर राख्ने र हप्तौं त्यही रंगको प्रयोग गर्ने गरेको पाईएको उनले बताए । अनुगमन टोलिले पहिलो पटकका लागि अखाद्य रंग नष्ट गरेको र पुनः दोहोरीए कारवाही गर्ने बागलुङ नगरपालिका उपभोक्ता हित संरक्षण समितिका सदस्य सचिव सरस्वती रेग्मीले बताईन् । रेष्टुरेण्टहरुमा प्रयोग हुने तेल परीक्षणमा भने अधिकांशमा सन्तोषजनक नतिजा भेटिएको थियो । खाद्य प्रबिधि तथा गुण नियन्त्र कार्यालय बागलुङले प्रबिधिको प्रयोग गरेर गरेको वरीक्षणमा सबैभन्दा राम्रो बेष्ट वन रेष्टुरेण्टमा तेल भेटियो भने मुखै रसायो रेष्टुरेण्टको तेल नष्ट गर्नुपरेको रेग्मीले बताईन् ।
चटपट तथा पानीपुरी व्यवसायीले अखाद्य रंगको प्रयोग गर्ने गरेको, पत्रपत्रिकामा पोका पारेर बिक्रि गर्नेगरेको लगायतका गुनासो आएकाले अनुगमन गर्नुपरेको उपभोक्ता मञ्च बागलुङका अध्यक्ष ैलेन्द्रकुमार श्रेष्ठले बताए । उनले उपभोक्ता हित बिपरितका कार्य नगर्न व्यवसायीलाई सचेत गराईएको समेत बताए ।
चटपट र पानीपुरीमा खानै नहुने अखाद्य रंग भेटियो
