बागलुङ
बागलुङ जिल्लाको दक्षिणमा रहेको जैमिनी नगरपालिकाको केन्द्र कुश्मीसेरादेखि पर्वतको फलेबास, कार्कीनेटा, जुग्ले हुँदै पोखरासम्म बस सेवा संचालनमा आएको छ ।
नगर उपप्रमुख हरिहर शर्मा, यातायात प्रालिका पदाधिकारी, व्यवसायी लगायतको उपस्थितिमा बिहीबार बिहानबाट बस सेवा सञ्चालनको शुभारम्भ गरिएको हो ।
जैमिनी नगरपालिकाको पहल र पृथ्वी राजमार्ग बस संचालन प्रालि पोखरा र स्याङ्जा गण्डकी बस संचालन प्रालिसँगको समन्वयमा बस सेवा संचालनमा ल्याइएको नगर उपप्रमुख शर्माले बताए ।
कुश्मीसेरादेखि पोखराका लागि हरेक बिहान ७ बजे र पोखरा, नागढुंगाबाट कुश्मीसेराका लागि दिउँसो ११ बजे बस छुट्ने उहाँले जानकारी दिए । बसको एकतर्फी भाडा ५ सय ५० तोकिएको बताइएको छ । उपप्रमुख शर्माले कुश्मीसेरा पोखरा बस सेवा संचालनमा आएसँगै दक्षिण बागलुङका नागरिकलाई प्रदेश राजधानी पोखरा आउजाउ गर्न सहज हुने उल्लेख गरे ।
यसअघि जैमिनी र बरेङ क्षेत्रका सर्वसाधारण पोखरा जान मालढुंगाहुँदै पोखरा–बागलुङ राजमार्ग प्रयोग गर्दै आएका थिए । कुश्मीसेरा पोखरा जोड्ने वैकल्पिक सडक संचालनमा आएपछि स्थानीयलाई यातायात सेवा र सामान ढुवानीमा सहजता हुने अपेक्षा समेत गरिएको छ ।