काठमाडौं – गायक बद्री पंगेनीको हिन्दू र मुस्लिमबिचको प्रेम सम्बन्ध गाँसिएको म्युजिक भिडियो ‘कन्या राशी’ सार्वजनिक भएको छ । नारायण ज्ञवालीको शब्द रहेको गीतमा पंगेनी र चर्चित गायिका समीक्षा अधिकारीको स्वर रहेको छ ।
राजनीतिमा सक्रिय रहेकी गायक बद्री पंगेनीकी छोरी बिहानीले ‘कन्या राशी’बाट अभिनय सुरु गरेकी छन् । बीएएलएलबी अध्ययनरत बिहानीले सत्तारुढ दल नेकपा एमाले निकट अनेरास्ववियुकी केन्द्रीय सदस्य पनि हुन् ।
प्रशान्त मगरको नृत्य निर्देशन रहेको गीतको भिडियोमा बिहानीसँगै अशोक पंगेनी, हमिद मियाँ, भवानी पंगेनी, श्याम पटेलको नृत्य तथा अभिनय रहेको छ ।
गीतको भिडियोमा हिन्दू समुदायको युवती र मुसलमान समुदायको युवकबीचको प्रेम सम्बन्धलाई देखाइएको छ । यसअघि सामाजिक र राजनीतिक सन्देश दिने गीत प्रस्तुत गर्दै आएका पंगेनीले यस पटक भने फरक समुदायका केटाकेटीबिचको प्रेम सम्बन्धलाई समेटेर नयाँ गीत ल्याएका हुन् । उक्त गीतको भिडियोमा गायक पंगेनीले आफ्नै छोरी बिहानीलाई अभिनय गराएका छन् ।
गीतको भिडियोको निर्देशन र गीतमा संगीत पनि गायक पंगेनीले नै गरेका छन् । गीत पंगेनीकै युट्युब च्यानलबाट बिहीबार सार्वजनिक भएको हो ।
गीतबारे गायक पंगेनीले नेपाल प्रेससँग प्रतिक्रिया दिँदै भने, ‘मैले नेपालमा एकदमै धार्मिक सहिष्णुता पाउँछु । नेपालमा अहिलेसम्म मुस्लिम र हिन्दूबिचमा सामाजिक सद्भाव एकदमै लोभलाग्दो छ । त्यसैलाई देखेर यो गीत फुरेको हो । मेरै दिदीबहिनीको पनि मुस्लिमसँग विवाह भएको छ ।’
छोरीलाई भिडियोमा खेलाउन बल गरेको कि छोरीले नै रहर गरेको भन्ने प्रश्नमा उनले भने, ‘छोरी नै खेल्ने भन्ने थिएन, एउटा रहरमात्रै पूरा गर्छु भन्यो । छोरीले नृत्य गर्छ भन्ने पनि थाहा थिएन । सुटिङमा त राम्रै नृत्य ग¥यो । पछि अलिकति नृत्य गर्ने खालकै बनाउन पाए हुन्थ्यो जस्तो पनि लाग्यो ।’
बिहानीले पनि उक्त गीत आफूलाई धेरै मनपरेकाले रहर नै गरेर खेलेको नेपाल प्रेससँग बताइन् । उनले भनिन्, ‘यो गीत मलाई धेरै मन परेको हो । रहर पहिलेदेखि थियो । म्युजिक भिडियोमा खेल्ने रहन अब यसै गीतमा नै पूरा गर्नुपर्छ भनेर गरिहालें । करियर नै त त्यतातिर सोचेको छैन ।’
गीत सार्वजनिक भइसकेपछि कस्ता प्रतिक्रिया आएका छन् भन्ने प्रश्नमा उनले भनिन्, ‘धेरैले राम्रो प्रतिक्रिया दिनुभएको छ । मलाई एक हिसाबले राम्रै गरेको रहेछु भन्ने महसुस भएको छ । हामीले सोचेका थिएनौं भन्ने खालको प्रतिक्रिया पनि आएको छ ।’
भिडियो
नेपाल प्रेसबाट