विश्वकप फुटबलमा लामो समयदेखि कायम रहेको दक्षिण अमेरिकी वर्चस्व पछिल्ला दुई दशकमा युरोपले खोसिरहेको छ । सन् २००२ यता दक्षिण अमेरिकी राष्ट्रले विश्वकप जित्न सकेका छैनन् ।
यो अवधिमा आयोजना भएका विश्वकपका चार संस्करणमा एकपटकमात्र दक्षिण अमेरिकी टोली फाइनल पुग्यो । यतिमात्र होइन, यही अवधिमा युरोप बाहिर आयोजना भएको विश्वकप पहिलोपटक युरोपेली टोलीले जित्यो ।
युरोपको बढ्दो दबदबाबीच बलिया दक्षिण अमेरिकी टोलीको विश्वकप यात्रा कसरी टुंगिने गरेको छ भन्ने बुझ्न ब्राजिल र अर्जेन्टिना कसरी बाहिरिरहेका छन् भन्ने जान्नु आवश्यक हुन्छ ।
ब्राजिल सर्वाधिक ५ पटकको विजेता हो । अर्जेन्टिनाले दुईपटक विश्वकप जितेको छ । सन् २०१४ को विश्वकपमा फाइनलसम्म पुग्ने टोली पनि अर्जेन्टिना थियो । पछिल्लो करिब दुई दशकमा ब्राजिल र अर्जेन्टिनालाई युरोपका जर्मनी र फ्रान्सले पाखा लगाइरहेका छन् ।
फ्रान्स साविक विजेता हो । सन् १९९८ मा ब्राजिललाई नै फाइनलमा हराएर फ्रान्स पहिलोपटक विश्व विजेता बनेको थियो । जर्मनी चारपटकको विजेता हो ।
विश्वकप २००६
सन् २००२ मा जर्मनीलाई हराएर ब्राजिल अन्तिमपटक विश्व च्याम्पियन बनेको थियो । त्यसयता ब्राजिलले यो प्रतियोगितामा फाइनलसम्मको यात्रा तय गर्न सकेको छैन । जर्मनीमा सन् २००६ मा आयोजना भएको विश्वकपमा अर्जेन्टिना र ब्राजिल क्वार्टरफाइनलभन्दा अगाडि बढ्न सकेनन् । जर्मनीले अर्जेन्टिनालाई टाइब्रेकरमा पराजित गरेको थियो भने फ्रान्सले ब्राजिलमाथि १–० गोलको जीत हात पारेको थियो । फ्रान्स फाइनलसम्म नै पुगेको थियो । तर, उपाधि भने जित्न सकेन ।
विश्वकप २०१०
दक्षिण अफ्रिकामा आयोजना भएको यो विश्वकपमा ब्राजिल र अर्जेन्टिना फेरि क्वार्टरफाइनलभन्दा अगाडि बढ्न सकेनन् । जर्मनीले अर्जेन्टिनालाई ४-० गोलले हरायो । उच्च लयमा रहेका मेस्सी र प्रशिक्षक डिएगो म्याराडोना रहेको अर्जेन्टिनाका लागि त्यो लज्जास्पद पराजय थियो । ब्राजिल नेदरल्यान्ड्ससँग १-० गोलले पराजित भएको थियो । नेदरल्यान्ड्स फाइनल नै पुग्यो । तर, उपाधि जित्न सकेन ।
उक्त विश्वकप स्पेनले जितेर युरोप बाहिर आयोजना भएको विश्वकप जित्ने पहिलो युरोपेली टोली हुने कीर्तिमान बनाएको थियो ।
विश्वकप २०१४
ब्राजिलमा आयोजना भएको यो विश्वकपमा जर्मनी र अर्जेन्टिना फाइनल पुगेका थिए । जर्मनीले सेमिफाइनलमा ब्राजिलमाथि ७–१ गोलको जीत हात पारेको थियो । ब्राजिलको पराजयमा धेरैवटा खराब कीर्तिमान बनेका थिए । जर्मनीले क्वार्टरफाइनलमा फ्रान्सलाई हराएको थियो ।
अर्जेन्टिना भने नेदरल्यान्ड्समाथि टाइब्रेकरमा जीत हात पार्दै २४ वर्षपछि विश्वकपको फाइनल पुगेको थियो । अर्जेन्टिनाले उपाधि भने जित्न सकेन । अतिरिक्त समयमा निर्णायक गोल गर्दै जर्मनी दक्षिण अमेरिकामा विश्वकप जित्ने पहिलो युरोपेली टोली बनेको थियो ।
विश्वकप २०१८
चार वर्षअघि रुसमा आयोजित विश्वकपमा पनि दक्षिण अमेरिकी टोली फाइनल पुग्न सकेनन् । अर्जेन्टिना प्रि-क्वार्टरफाइनल र ब्राजिल क्वार्टरफाइनलभन्दा अगाडि बढ्न सकेन । अर्जेन्टिनालाई फ्रान्सले ४-३ गोलले हराएको थियो । फ्रान्स पछि विश्व विजेता नै बन्यो । क्वार्टरफाइनलमा ब्राजिललाई १-० गोलले हराएको बेल्जियम भने सेमिफाइनलभन्दा अगाडि बढ्न सकेन ।
सन् २००२ अघि
सन् २००२ को विश्वकपअघि पनि अर्जेन्टिना, जर्मनी, फ्रान्स र ब्राजिल कडा प्रतिद्वन्द्वी थिए । तर, त्यतिवेलासम्म प्रायः दक्षिण अमेरिकी टोलीहरु नै हावी थिए । ब्राजिलले सन् १९७० को विश्वकप तत्कालीन पश्चिम जर्मनीलाई हराएर जितेको थियो । अर्जेन्टिनाले सन् १९८६ को विश्वकपको फाइनलमा पनि पश्चिम जर्मनीलाई पराजित गरेको थियो ।
सन् १९९० को विश्वकप फाइनलमा भने पश्चिम जर्मनीले अर्जेन्टिनालाई हराएको थियो । सन् १९५८ को विश्वकप सेमिफाइनलमा ब्राजिलले फ्रान्सलाई हराएको थियो । सन् १९८६ को विश्वकपमा ब्राजिललाई टाइब्रेकरमा हराएर फ्रान्स सेमिफाइनल पुगेको थियो ।