प्रमुख प्रतिपक्ष दल नेपाली कांग्रेसकी केन्द्रिय सदस्य सांसद डा.डिला संग्रौलाले सरकारले सत्ता टिकाउनका लागि पैसाको खोलो बगाएको आरोप लगाएकी छन् ।
नचाहिएका आयोग तथा निकायहरुको गठन गरेर पैसाको खोलो बगाइएको उनको आरोप छ । ‘आफ्ना कार्यकर्ता भर्ती गर्न सरकार तल्लिन छ, त्यसकालागि नचाहिएका आगोग पनि गठन भएका छन्’ संग्रौलाले भनिन्, ‘अधिनायकबादी सरकार देश खोक्रो बनाउन लागेको छ ।’
नेपाल प्रेस युनियन बागलुङले आईतबार बागलुङ बजारमा आयोजना गरेको पत्रकार भेटघाट कार्यक्रममा संग्रौलाले कोरोना महामारी जस्तो संवेदनशिल समयमा सरकार भ्रष्टाचार बढाउने र सत्ता टिकाउने खेलमा लागेको आरोप लगाईन् । ‘सरकार आँफुलाई बचाउनमा तल्लिन छ, कोरोना महामारीमा परेका जनता जोगाउने कुनै काम गरेको छैन’ उनले भनिन् ‘जनताले सरकारबाट पनि असुरक्षित महशुस गरेका छन् ।’ बालुवाटारमा स्विच थिचेर जनचाहना अनुसारको बिकास नहुने उनको टिप्पणी थियो । ‘स्वीच थिचेर बाटोको उद्घाटन हुन्छ, काम हुँदैन्’ संग्रौलालले भनिन् ‘हेर्नुस त सरकारले अस्पताल शिलान्यास गरेको ठाउँहरुमा जग्गा समेत भेटिँदैन् ।’
एमसीसीको बिषयमा नेपाली कांग्रेस सकरात्मक रहेको उनले बताईन् । उनले एमसीसी पास गर्ने बिषय सहित कांग्रेस नेतृत्वको सरकार बन्ने समेत बताइन् । केपी ओली नेतृत्वको सरकार अधिनायकबादी सरकार भएको भन्दै उनले अव प्रमुख प्रतिपक्ष दल नेपाली कांग्रेसको नेतृत्वमा सरकार गठन हुने दावी गरिन् । ‘अधिनायक बिरुद्ध प्रदेशबाट सन्देश दिने काम सुरु भएको छ, हेर्दै जानुहोस, नयाँ बर्षको उपहार नयाँ सरकार आउँछ’ संग्रौलाले भनिन् ‘अभिव्यक्ति स्वतन्त्रता माथी हस्ताक्षेप गर्ने, संविधान माथी प्रहार गर्ने सरकार अब धेरैदिन टिक्दैन् ।’