पर्वत,२१ भदौ-सत्तारुढ दल नेपाल कम्युनिष्ट पार्टी नेकपा निकट राष्ट्रिय युवा संघ पर्वतको युवा भेला फलेवास नगरपालिकाको शंकरापोखरीमा सम्पन्न भएको छ । युवासंघले युवा जागरण अभियान अन्तर्गत उक्त भेलाको आयोजना गरेको हो । कोरोना संक्रमण र यसबाट बच्ने उपायहरुको बारेमा जनचेतना फैलाउँदै संगठन मजबुद बनाउने अभियान युवा संघले शुरुवात गरेको हो ।दुई युवा संगठन वीच एकता भइ निर्माण भएको राष्ट्रिय युवा संघले संगठन विस्तार, कमिटिहरुको गठन र सरकारले गरेका राम्रा कामहरुको प्रचार गाउँसम्म गराउने उद्देश्यका साथ युवा भेटघाट तथा जागरण अभियानलाई निरन्तरता दिएको अध्यक्ष थमनारायण पौडेलले जानकारी दिए ।
पौडेलका अनुसार शनिवार फलेवास नगरपालिका वडा न ३ शंकरपोखरीका युवाहरु वीच भेटघाट तथा अन्तरक्रिया कार्यक्रमको आयोजना गरिएको छ । समुदायमा कोरोना संक्रमण पुष्टि नभए पनि संक्रमणको जोखिमलाई मध्यनजर गर्दै सुरक्षाका विधिहरु अपनाएर भेलाको आयोजना गरिएको अध्यक्ष पौडेलले जानकारी दिए ।पौडेलका अनुसार भेलाका सहभागीहरुले राष्ट्रिय राजनीति, युवा परिचालन तथा संगठन सबलीकरणका विषयमा छलफल भएको थियो । दुई संगठन वीच एकता भए पनि जिल्ला कमिटिको गठन प्रक्रिया पुरा भएको छैन ।
अध्यक्ष पौडेलले छिटै जिल्ला समितिको गठन गरी संगठनका थप गतिविधिहरुलाई अघि बढाउने गर्ने जानकारी समेत गराएका थिए । युवा संघले जिल्ला, नगर र वडा कमिटिहरुको गठन गरी संगठनका गतिविधिहरुलाई थप शसक्त पार्दै लैजाने गरी योजना निर्माण गर्न लागेको अध्यक्ष पौडेलको भनाई छ ।
भेलामा युवा सघ पर्वतका अगुवा नेताहरुले अर्जुन पौडेल,नवराज गिरि, लकाश सुवेदी लगायतका युवाहरुलाई संगठन विस्तार र अनु्शासन लगाएता विषयमा जानकारीमूलक मन्तब्य राखेका थिए ।