बागलुङ/बेसिजनको डेंगी संक्रमण बढेको भन्दै सोमबारबाट खोज र नष्ट गर अभियान संचालनमा ल्याइएको छ । साथै नागरिकमा सचेतना फैलाउने गरी सरोकारवाला जागेका छन् ।
सोमबार बागलुङ नगरपालिका वडा नंं २ बाट अभियान थालिएको छ । नगरपालिका, प्रशासन र सुरक्षा निकायसँगै स्वास्थ्यकर्मी समेतले खोजेर नष्ट गर्ने, नागरिकलाई सचेत बनाएर घरघरको फोहोर सफाइ गर्ने, पानी जन्म नदिने काम थालिएको बागलुङ नगरपालिका स्वास्थ्य शाखाका प्रमुख रामप्रसाद खनालले बताए ।
सोमबार बिहान बानपा २ वडा कार्यालयबाट शुरु भएको अभियानलाई विभिन्न समूमा बिभाजन गरेर घरघरमा पुग्ने वातावरण बनाइएको छ । त्यसमा प्रहरी समेत सहभागि छन् । मौषम सकिनै लाग्दा बागलुङमा डेंगी संक्रमण बढेकोले आइतवार सरोकारवालाको बैठकले नियन्त्रण अभियान संचालन गर्ने निर्णय गरेको थियो । यो अभियानलाइ सबै पालिकासम्म लैजाने तयारी भएको प्रदेश जनस्वास्थ्य कार्यालयका प्रमुख घनश्याम सापकोटाले बताए ।
सापकोटाका अनुसार जिल्लाभर २ सय ५७ डेंगीका रोगी रहेका छन् । सदरमुकाम स्थित बागलुङ नगरमा मात्रै १ सय ३६ संक्रमित भेटिएको उनले बताए । छिमेकी काठेखोलामा समेत दुइ दर्जनबढी संक्रमित भेटिएकोले ग्रामीण बस्तीमा पनि डेंगीको प्रकोप बढीरहेको प्रष्ट भएको उनले जानकारी दिए । आम नागरिकलाई स्वास्थ्य शिक्षा दिनकालागि प्रचार सामाग्री बनाएर रेडियो, टेलिभिजन र अनलाइनबाट प्रशारण गर्ने, बिद्यालय तहमा स्वास्थ्य शिक्षाको कक्षा संचालन गर्ने काम पनि शुरु भएको सापकोटाले बताए । त्यो अभियानकालािग फेयरमेड फाउण्डेसन र सम्बोधन परियोजनाले सामाग्री उत्पादन र बितरणमा आर्थिक सहयोग समेत गरेको छ ।
हाल संक्रमित मध्ये २० प्रतिशत मात्र उपचारको दायरामा आएकोले घरमा बसेका र उपचारमा नआएका बिरामीबाट संक्रमण जटिल बन्ने अबस्था आउने भएकोले सबैलाई उपचारमा ल्याउन पनि पहल भएको प्रमुख जिल्ला अधिकारी कुमानसिंह गुरुङले बताए । अत्याधिक ज्वरो आएमा, जोनी र मांसपेशी दुखेमा, शरिरमा डावर वा बिबिरा आएमा डेंगी परीक्षण गर्न पनि सुझाइएको छ ।